Hallo vriende!
Soveel het gebeur die afgelope paar maande. Van stil oomblikke langs die see tot groot oomblikke op die verhoog en elke ervaring het bygedra tot ’n onvergeetlike 2026 sovêr. Ek voel diep dankbaar en opgewonde oor wat die die res van die jaar vir ons almal inhou!
Wegbreek: Hentiesbaai, Namibia
Ek het ’n broodnodige wegbreek na my siels-plek, Hentiesbaai gehad saam met my gesin. Dit is een van die min plekke waar my batterye die beste herlaai. Dit was nodig om weer stil stappies langs die strand te vat en net met my Skepper te gesels. Laas jaar was ’n moeilike een vir my… En ek kon terugkom met baie vrede en nuwe idees vir musiek. Baie van dit gaan julle hoor op die nuwe album wat hierdie maand die lig sien!
Terug op die Verhoog: Shows & Optredes
Om op die verhoog te wees is een van die dinge wat my die gelukkigste maak. Om die musiek met julle te deel en te sien hoe dit deur almal vloei en die gesigte wat ophelder, is iets wat ek nie kan beskryf nie. Dankie vir almal se ondersteuning!
Ek het doelbewus besluit om dit ‘n bietjie rustiger te vat met toer en konserte in 2026 maar daar is darem nog ’n klomp wat voorlê, so asb kom sê hallo as ek iewers in jou area is! As jy wil hê ek moet in jou dorp kom hallo sê bespreek hier: https://bit.ly/Bespreek-Juanita
Nuwe Album Oppad
Ek is opgewonde om julle ’n voorsmakie van my nuwe album te gee. Die hart agter hierdie album is om iets uniek maar ook bekend aan julle te bied. Ek voel al vir ‘n geruime tyd dat ek al my getroue ondersteuners meer skuld as net ‘n enkelsnit elke paar maande… Ek wil graag weer ‘n hele album uitbring, soos in die ou dae! Waar die album jou op ‘n reis vat.. en waar ek stukkies van my hart en siel deel in die groter storie van my lewe. En dis iets wat ek self ook nog altyd geniet, om ’n volle album te luister!
“Hierdie Oomblik” is eersdaags beskikbaar op alle digitale platforms en die goeie nuus is dat ek hom ook vir julle beskikbaar gaan stel in CD formaat, én vir die eerste keer op USB stokkies! Kyk uit vir die bestellingsproses op my sosiale media.
Werk in die Studio
Vir die laaste paar jaar, vertrou ek vir Franja met al my produksies en liedjie-vervaardigings. Sy is omtrént nou al ‘n gesoute musiekvervaardiger in eie reg en haar talente as dit by musiek kom ken regtig geen einde nie! Ek is ongelooflik trots op haar en dankbaar dat sy my hart kon vasvang op hierdie album. Ons het lang aande gewerk en soos altyd is dit ’n familie-poging met almal wat insae lewer. Daar was ’n paar ander musikante wat ook saam aan die album gewerk het soos Floors Oosthuizen en sy pragtige vrou, Deedee. Ek gaan iewers in Mei op my Facebook vir julle vra wat julle gunstelinge op die album is, dan help julle my besluit van watse liedjie ons die volgende musiekvideo moet maak.
“Ek Staan Nog” Musiekvideo
“Ek Staan Nog” is meer as net ’n liedjie; dis ’n storie van deursettingsvermoë en hoop. Die video-opname het die emosie van die liedjie perfek vasgevang. Gaan kyk hom gerus op my Youtube kanaal. Gerduan Kemp het soos altyd die mooiste prentjies gemaak en ek wil ook dankie sê aan Henk en sy span van De Harte in Pretoria wat hulle pragtige venue vir ons beskikbaar gestel het.
Album Cover Shoot
Mens het gewoonlik nuwe foto’s nodig vir ’n album… Nou as julle dit nog nie van my weet nie, ek hou NIKS van ‘photoshoots’ nie! Maar wanneer dit saam met Willem Botha is, is dit op sy lekkerste. Hy weet hoe om my gemaklik te laat voel en op my mooiste te laat lyk. Dankie Willem! Ons het sommer van die dag gebruik gemaak om genoeg foto’s vir die hele jaar te neem! My span weet as ek hulle ’n dag gee, moet hulle die beste daarvan maak! 😂
“Ek Staan Nog” Die Liedjie en julle terugvoer
Toe ek moes besluit wat my eerste liedjie gaan wees na die stormagtige 2025, het ek geweet ek wil iets uitbring wat baie sê, diep uit my hart uitkom en iets wat kan bemoedig, want ek weet daar is soveel van ons daar buite wat verskriklike seer saam met ons dra. “Ek staan nog” sê presies dit wat ek voel maar nie altyd kan sê nie, deur die Here se genade alleenlik, staan ek nog en kan ek hoopvol na môre kyk. Baie dankie vir al die 1000’e boodskappe wat julle stuur om te sê wat die lied vir julle ook beteken. Dis al waarvoor ek gehoop het. Jy staan nog, ek staan nog en môre is ’n nuwe dag vol beloftes.
JD Exclusive: Produkte Reeks
Einde 2025 het ons die JD Exclusive webtuiste ’n nuwe baadjie gegee en albei die “Vlieg Hoog” en “Wees Lig” reekse ’n nuwe ‘look-and-feel’ gegee. Dis iets waarop ek verskriklik trots is en dit laat my altyd net so klein bietjie lekkerder voel as ek een van die parfume aanspuit. Daar is ook ‘n paar opwindende dinge wat voorlê! Gaan loer gerus in die aanlynwinkel as jy nog nie het nie, ek glo jy sal iets daar kry waarvan jy hou. Daar is goeie nuus later in die jaar ook oppad, so hou my volgende blog-inskrywing dop. 🙂
WEAPPRECIATEU10
Persoonlike Touch
Daar was so paar ander oomblikke ook die laaste paar maande wat vrek spesiaal was! My jongste seun, Mario en sy verloofde Anja het die knoop deurgehaak in Maart by een van die mooiste en lekkerste troues waarby ek nog ooit was. Hulle het alles self gereël en hulself regtig goed van hulle taak gekwyt. Uiteindelik trou een van my kinders!!! En nou is ek nog ’n dogter ryker. 😁 Hulle is só gelukkig en goed vir mekaar. Dis al waarvoor ’n ma en pa kan vra. Trane van blydskap het die hele dag gevloei.
My dogter, Franja (Mario se tweelingsussie) is ook verloof en dit beteken ons hou wéer bruilof binnekort. Kan julle glo? Sommer altwee in een jaar! Sy is nét so gelukkig en opgewonde, so my hart is vol!
Die res van die jaar, soos ek genoem het, hou baie dinge in. Nog ’n EP van my kant af, maar iets wat ek dink julle nie gaan verwag nie… 😉
Ek, Ruan Josh en Franja (Kaalvoetkinners) bring ’n tweede “Sing Country” album uit waaroor ek ook baie opgewonde is! So daar is BAIE nuwe musiek vir julle die jaar!
Nogmaals baie dankie vir julle liefde en ondersteuning. Julle sal nooit weet wat dit vir my beteken nie..
Tot volgende keer!
Liefde – Altyd
Dus lekker om jou nuwe blog te lees, jou nuwe liedjie beteken baie vir my. Ek gaan deur n moeilike tyd in my lewe, en ek weet nie altyd party dae hoekom ek nog leef nie. Hulle se daar is n doel, maar ek sien dit nie.
Ek is dankbaar vir jou musiek en miskien kan jy n show om doen in Pietermaritzburg. Dit sal wonderlik wees om weer een van jou shows te sien.
Sien uit na jou nuwe album.
Baie liefde
Chanel
Dis so mooi Blog soveel dinge om na uit te sien klaar my CD gepre-order kan nie wag nie. So dankbaar en n groot voorreg om jou en jou gesin al die jare te ondersteun sien uit na nog baie jare van ongelooflike musiek. Sal jul almal altyd ondersteun maak nie saak wat nie
Vriendelike groete en liefde
Chantell Stevens
Juanita, ek sal altyd opkyk na jou. En jy en ek is op dieselfde golflengte. Dankie vir jou menslikheid en liefde.
Jy is net meer as Amazing!
Soos die jare aanstap is dit net amazing om te sien hoe alles beter en beter raak, alhoewel ek alles van die “ou dae” verlang, daai gevoel van n brief in die pos kry, daai gevoel van storm na die cd winkel om die nuwe cd te kry, maar so verander alles maar wat dieselfde bly is jou omgee, liefde en hart, dit laat mens “save” voel, met elke drukkie gaan my brein deur n trip van memory lane want nog na al die Jare is jy diesele amazing engel mens vir wie ek so lief is en wat my lewe werklik verander het. So lief vir jou!
Wat ñ mooi blog… Baie baie geluk met alles wat jy aanpak. Dankie dat jy vir ons so groot Inspirasie is. Dat ons Jesus deur jou oë kan sien. Sjoe jy los my talle kere sonder woorde. Dan kyk ek op en sê. Dankie Jesus dat ek deel van Juanita se musiek kan wees. Dat ek die voorreg het om te kan luister hoe sy eindelik met elkeen van ons praat. Juanita jou hart is regrig mooi. Jou menswees is iets baie besonders. Ja jy is ñ vrou en ñ ma. Jy maak foute maar jou foute is nooit so groot soos God se genade oor jou. Jy is net AMAZING…
Dankie vir my pakkie. My CD en USB
Dankie vir jou mooi hart.
Liefde Groete
Maryna